ការប្រកួតប្រដាល់ក្បាច់ខ្មែរបុរាណអន្តរជាតិ ដែលមានឈ្មោះថា អាស៊ានវគ្គ៣របស់សង្វៀនស៊ីធីអិននៅស្តាតចាស់នឹងចាប់ផ្តើមអង្រួនសង្វៀនល្ងាចនេះហើយ ចាប់ពីម៉ោង៥ល្ងាចទៅ។ កំពូលអ្នកលេងគុនខ្មែរ៦នាក់នឹងទទួលស្វាគមន៍អ្នកលេងឆ្លងដែនមកពីប្រទេសថៃ ៣ នាក់ និង ឡាវ ៣ នាក់។
ជើងខ្លាំងវ័យក្មេង ហុន ឈុនហេង ត្រូវប្រឈមនឹងកីឡាករថៃ ខៀវ មរកត ក្នុងប្រភេទទម្ងន់ ៥២ គីឡូក្រាម។ គូនេះមានលក្ខណៈខុសគ្នាបន្តិចដោយមរកតអាយុទើបតែ ១៦ ឆ្នាំ ខណៈឈុនហេងអាយុ ១៩ ឆ្នាំ ប៉ុន្តែ កីឡាករភ្ញៀវធ្លាប់ប្រកួតបាន ៧០ ដង ឈ្នះ ៥០ ចាញ់ ១០ ស្មើ១០ និង ធ្លាប់វាយគូប្រកួតឲ្យសន្លប់១៥ដង ខណៈកីឡាករម្ចាស់ផ្ទះធ្លាប់ប្រកួត ៦១ ដង ឈ្នះ៥៤ ចាញ់៦ ស្មើ១ និងធ្លាប់ផ្តួលគូប្រកួតឲ្យសន្លប់១១ដង។
គូទីពីរ ផាន់ គ្រាន់ ត្រូវប៉ះកីឡាករឡាវ ប៊ុន ឡាយ ក្នុងទម្ងន់៦៤គីឡូក្រាម។ អ្នកប្រដាល់កម្លាំងខ្លាំង ផាន់ គ្រាន់ ធ្លាប់ប្រកួតបាន ៣៣ ដង ឈ្នះ ២៦ ចាញ់ ៥ និង ស្មើ ២ ដង ខណៈជើងខ្លាំងឡាវធ្លាប់បានប្រកួតបាន ៤០ ដង ឈ្នះ ៣០ និង ចាញ់ ១០ ដង។
ឃីម ឌីម៉ា ត្រូវតទល់នឹងកីឡាករឡាវ អូ រ៉ូណូដែលមានកម្ពស់ ១,៧២ ម៉ែត្រស្មើគ្នា និង មានប្រវត្ដិប្រកួត ៦០ ដងដូចគ្នា។ ឃីម ឌីម៉ាមានកំណត់ត្រាល្អជាងដោយឈ្នះ៥៣ដង ចាញ់៤ដង ស្មើ៣ និងធ្លាប់វាយដៃគូឲ្យសន្លប់១៩ដង ស្របពេល អូ រ៉ូណូ ធ្លាប់ឈ្នះ៥០ដង ចាញ់១០ដង និងធ្លាប់វាយគេឲ្យសន្លប់ត្រឹម៥ដង។
អ្នកលេងឆ្លងដែនថៃ នៀវ សែនឈឿង ត្រូវប្រឈមនឹងកីឡាករមិនសូវមានសាច់ ឈាន ហុង ក្នុងទម្ងន់៦១គីឡូក្រាម។ កីឡាករថៃម្នាក់នេះធ្លាប់ប្រកួត៦០ដង ឈ្នះ៤៥ និងចាញ់១៥។ ចំណែនឈាន ហុង ធ្លាប់ប្រកួត៥៩ដង ឈ្នះ៤៤ ចាញ់១៣ និងស្មើ២ដង។
គូគួរឲ្យចាប់អារម្មណ៍ ម្ចាស់ខ្សែក្រវាត់វ័យ១៨ឆ្នាំ ឡៅ ចន្ទ្រា ស្វាគមន៍កីឡាករថៃអាយុ២០ឆ្នាំ ឌែន ឦសាន។ ជើងខ្លាំងថៃវ័យក្មេងនេះប្រកួតបាន៥៨ដង ឈ្នះ៤៣ ចាញ់១២ និងស្មើ៣ដង ហើយឡៅ ចន្ទ្រា ប្រកួតបានត្រឹម៣៨ដង ឈ្នះ៣៦ ចាញ់១ និងស្មើ១ដង។
គូឯកប្រចាំព្រឹត្តិការណ៍ ម្ចាស់ខ្សែក្រាវាត់ពិភពលោក ISKA វ៉ន វីវ៉ា ត្រូវប៉ះកីឡាករឡាវ រ៉ា ឆាន់។ អ្នកទម្ងន់ធ្ងន់ឡាវ រ៉ា ឆាន់ មានកម្ពស់១,៧៤ម៉ែត្រ និងអាយុ២៧ឆ្នាំ ធ្លាប់ប្រកួតបាន៦០ដង ឈ្នះ៥៥ ចាញ់៥ និងធ្លាប់ផ្តួលគូប្រកួតឲ្យសន្លប់៥ដង៕
0 comments:
Post a Comment